Një ish-deputet rus, i cili tani kundërshton Kremlinin, po hetohet për përhapjen e informacionit të rremë për ushtrinë, tha sot agjencia e lajmeve TASS, duke cituar një gjykatë në Moskë, përcjell Bota sot.
Gjykata tha se hetuesit kishin kërkuar "arrestimin në mungesë" të Ilya Ponomaryov, gjë që e bën atë një person të kërkuar dhe do të thotë se ai do të përballej me paraburgim nëse do të kthehej në Rusi.
Sipas një ligji të miratuar tetë ditë pasi forcat ruse pushtuan Ukrainën, "shpërndarja publike e informacionit qëllimisht të rremë" për forcat e armatosura dënohet me gjoba ose, në rastet më të rënda, deri në 15 vjet burg.
Ponomaryov ka qenë nën presion në Rusi që kur u bë i vetmi ligjvënës në dhomën e ulët të parlamentit prej 450 anëtarësh, Duma, që votoi kundër aneksimit të Krimesë nga Ukraina në vitin 2014.
Në një postim në aplikacionin e mesazheve Telegram, ai hodhi poshtë zhvillimin e fundit, duke thënë se do të ishte hera e dytë që ai do të arrestohej në mungesë.