KE: Shkelja e sanksioneve të BE-së konsiderohet një vepër penale në të gjithë bllokun

Evropë

KE: Shkelja e sanksioneve të BE-së konsiderohet një vepër penale në të gjithë bllokun

Më: 2 dhjetor 2022 Në ora: 23:10
Foto ilustrim

Shkelja e sanksioneve të BE-së do të konsiderohet një vepër penale në të gjithë Bashkimin Evropian, sipas një propozimi të Komisionit Evropian.

“Harmonizimi i dënimeve për shkeljen e sanksioneve të BE-së nuk do të thotë më boshllëqe, jo më strehë të sigurta dhe jo më lojë të sistemit”, tha zëvendëspresidentja e Komisionit, Vera Jourova në një deklaratë.

BE vendosi raunde të shumta sanksionesh ndaj Rusisë për pushtimin e Ukrainës, duke synuar ekonominë e Rusisë, sistemin financiar, bankën qendrore, zyrtarët e lartë të qeverisë, si dhe presidentin rus, Vladimir Putin dhe rrethin e tij të ngushtë.

Miliarda euro pasuri janë ngrirë dhe më shumë se 1000 individëve u është ndaluar të udhëtojnë në bllok. Shtetet anëtare të BE-së janë përgjegjëse për zbatimin, megjithatë, me rezultate të fragmentuara.

Tani, komisioni kërkon ta bëjë më të lehtë hetimin dhe ndëshkimin e shkeljeve të sanksioneve, duke përfshirë përpjekjet për të anashkaluar masat ndëshkuese.

Tregtimi i mallrave të sanksionuara, dështimi për të ngrirë fondet ose për të parandaluar personat e synuar të hyjnë në BE do të dënohen me të paktën pesë vjet burg, sipas propozimit të komisionit.

Kompanitë e zbuluara si bashkëpunëtore në lehtësimin e evazionit të sanksioneve, të paktën, do të goditen me gjoba financiare me vlerë 5% të xhiros vjetore globale.

Gjithashtu, ofrimi i shërbimeve financiare ose ligjore për individët e listuar, si dhe përpjekjet për të fshehur identitetin e një personi që i nënshtrohet sanksioneve të BE-së si pronarë të një aseti të tillë si, një jaht luksoz ose një vilë pushimi, do të dënohen me masa të ashpra.

Vendimi i komisionit vjen pasi BE-ja po përpiqet ta bëjë më të lehtë konfiskimin e pasurive të oligarkëve rusë, si pjesë e përpjekjeve më të gjera për të ndihmuar në financimin e rindërtimit të Ukrainës.

Pasuritë private, të ngrira nga sanksionet e BE-së, mund të konfiskohen vetëm në lidhje me një vepër penale. /DPA/

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat