Trajneri Xavi Hernandez në një konferencë për media sot para ndeshjes kundër Atletico Madridit, ka bërë të ditur nëse Ousmane Dembele do të vazhdojë me paraqitje në fanellën e Barcelonës.
Gjatë merkatos së janarit, Barcelona dështoi që të arrijë marrëveshje me Dembelen për rinovim kontrate, gjë që bëri që gjigandi katalunas t’i vë ultimatum yllit francez.
Barça i kishte komunikuar Dembeles që ose të nënshkruajë kontratën e re ose të largohet nga skuadra sepse nuk do të paraqitej më me ekipin.
Por, si duket fjalët e krerëve të gjigandit katalunas kanë qenë vetëm fjalë, pasi që Dembele është grumbulluar për ndeshjen e nesërme kundër kampionit spanjoll.
Këtë gjë e konfirmoi sot në konferencën për media trajneri Xavi, i cili tha që Dembele është pjesë e skuadrës.
“Çdo gjë e mundur që duhet të bëhej për të gjetur një rrugë për ta larguar Dembelen u bë. E kuptoj pozitën e të gjithëve, por na duhet që të bëjmë më të mirën për klubin. Ne mendojmë që ai do të na ndihmojë neve, kështu që Dembele do të jetë pjesë e skuadrës nesër”, tha Xavi.
Nesër me fillim nga ora 16:15, gjigandi katalunas Barcelona do të zhvillojë ndeshje si vendase në “Camp Nou”, ku aty e pret kampionin spanjoll Atletico Madrid.
