Florentino Perez, presidenti i Real Madrid, duket se i ka idetë e qarta. Ai nuk ka ndërmend ta zëvendësojë Lopetegui-n me një trajner të ngjashëm me të.
Ideja e numrit një të “Los Blancos” është ta mbajë ish-trajnerin e Spanjës deri në fundin e sezonit ose të zgjedhë një trajner të përkohshëm në vendin e tij në pritje të Jose Mourinho-s.
Është pikërisht portugezi 55-vjeçar zgjedhja e Florentino Perez për sezonin e ardhshëm. Është pikërisht ai “galaktiku” mbi të cilin presidenti i madrilenëve do të kërkojë të ndërtojë të ardhmen. Një zgjidhje kjo që është tunduese edhe për trajnerin e “Djajve”.
“Mourinho do të jetë trajneri i ardhshëm i Real Madrid, duan apo nuk duan njerëzit. Është vetëm çështje kohë”, ka thënë gazetari spanjoll sportiv Eduardo Inda, gjatë emisionit “El Chiringuito”.
Gjithashtu, transferimi i Mou në “Bernabeu” do të thotë një spastrim brenda ekipit, me Sergio Ramos dhe yje të tjerë të ekipit që do të kishin ditët të numëruara.