Kryeprokurori i Zyrës së Prokurorit të Specializuar, David Schwendiman, ka takuar të hënën, Kryeprokurorin e Shtetit, Aleksandër Lumezi. Zyrtarisht, u tha, se dy kryeprokurorët diskutuan për organizimin, funksionet, kompetencat dhe juridiksionin e Dhomave të specializuara dhe Zyrës së Prokurorit të Specializuar.
Por, realisht, ka zëra se Kryeprokurori i Zyrës së Prokurorit të Specializuar i ka kërkuar Lumezit informacione rreth lëndëve të krimit të organizuar dhe korrupsionit, lëndë këto që për drejtësinë vendore, kanë qenë të paprekshme. Më herët, një burim nga Prokuroria e Shtetit, pati konfirmuar, se Gjykta Speciale, do të merret me rastet e rënda, të cilat prokurorët e Kosovës, nuk kanë guxuar t’i shqyrtojnë. “Gjykata Speciale është e orientuar tjetërkund.
Ajo do të na ndihmojë shumë, pasi do të pastrojë shumë institucione, gjithashtu do të jetë e dobishme për ne. Duhet të bëhen hetimet ndaj miliarderëve, ku kanë qenë dhe ku janë tani, si kanë ardhur deri këtu.
U mbytën sa emra lakohen dhe sa kompani lakohen e ne s’jemi askund. Gjykata Speciale, nuk është vetëm për krime lufte , por do të përfshijë edhe krime të tjera. Atje do shkojnë krimet ekonomike, korrupsioni dhe krimi i organizuar.
Vendorët e kanë patur problem të akuzojnë për shkak të rrethanave”, ka thënë më herët i njëjti burim. Sipas këtij të fundit, lëndët e krimeve të luftës do t’i lihen Prokurorinë Speciale të Kosovës, pasi Gjykata Speciale do të merret më korrupsion dhe krimin e organizuar në nivel të lartë dhe gjithnjë sipas të njëjtit, burim, Gjykata Speciale do të jetë shpresë për drejtësinë.
(Tekstin e plotë mund ta lexoni të Mërkurën në publikimin e shtypur të gazetës kombëtare “Bota sot”)