Lobimi për ndarjen e Kosovës/ Eksperti amerikan e zbulon: Dhurata Hoxha mund të ketë qenë nën presionin e këtij politikani

Politika

Lobimi për ndarjen e Kosovës/ Eksperti amerikan e zbulon: Dhurata Hoxha mund të ketë qenë nën presionin e këtij politikani

Nga: A.Zhushi Më: 8 korrik 2021 Në ora: 08:18
Alon Ben-Meir

Prokuroria Speciale e Kosovës, ka njoftuar dje se ka ngritur aktakuzë ndaj ish-ministres së Integrimit Evropian të Kosovës, Dhurata Hoxha, dhe katër të pandehurve të tjerë.

Hoxha, ish-shefi i prokurimit i kësaj ministrie, Fitim Mustafa, e tre ish-sekretarët: Demush Shasha, Nuhi Osmani e Kushtrim Cukaj, akuzohen për veprën penale: “keqpërdorim i pozitës apo autoritetit zyrtar”.

Ata akuzohen se i kanë paguar 168,000 euro një kompanie lobimi me seli në Paris, që kishte promovuar idenë se “modifikimi i territorit” mund të jetë një zgjidhje në dialogun Kosovë-Serbi.

E pagesën e lobimit për të promovuar modifikimin e territorit të Kosovës, e konsideron të paligjshme profesori dhe eksperti amerikan për politikën dhe çështjet e Ballkanit, Alon Ben-Meir.

Duke folur për gazetën “Bota sot”, ai ka thënë se Bashkimi Evropian ka hedhur poshtë çdo ide të modifikimit territorial bazuar në ndarjen etnike.

“Sipas mendimit tim, pagesa e një lobi të huaj për të promovuar modifikimin e territorit në Kosovë është e paligjshme. Kosova së bashku ka kundërshtuar çdo koncesion territorial dhe për më tepër vetë BE hedh poshtë çdo ide të modifikimit territorial bazuar në ndarjen etnike”, është shprehur Ben-Meir.

Eksperti amerikan, aktakuzën ndaj ish-ministres së PDK-së e konsideron “goditje” ndaj ish-presidentit Hashim Thaçi. Sipas tij, Hoxha mund të ketë qenë nën presion nga Thaçi, për ta kryer një veprim të tillë të jashtëligjshëm.

“Paraqitja e kësaj aktakuze është sigurisht një goditje për ish-presidentin Hashim Thaçi, i cili padyshim promovoi këtë koncept të rregullimit të territorit. Mund të shtoj se ish-Ministrja e Integrimit Evropian Dhurata Hoxha mund të ketë qenë nën presion nga ish-presidenti, në vend që të veprojë vet për të kryer një veprim të tillë të jashtëligjshëm, si dhe jo etik, i cili padyshim minon interesin kombëtar të Kosovës”, ka theksuar Alon Ben-Meir për “Bota sot”.

Ish-ministrja Hoxha ka deklaruar se është e pafajshme dhe se nuk ka bërë asnjë keqpërdorim.

Edhe ish-sekretari në MIE Demush Shasha, ka thënë se “nuk e ka mizën pas veshi”, duke u shprehur i befasuar nga vendimi i prokurorisë, e cila nga të qenit dëshmitar e ka zhvendosur në të qenit i pandehur. Ai ka treguar se kontratën për lobim, e kishte dërguar për interpretim në Agjencinë Kundër Korrupsionit dhe Komisionin Rregullativ të Prokurimit Publik, për tu siguruar se asnjë veprim i MIE-së të mos ishte në kundërshtim me ligjin./Botasot

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat