Interesim i dobët për pritjen e vitit të ri në hotelet në Ohër dhe Strugë. Për momentin disa prej tyre nuk punojnë fare për shkak të krizës energjetike, e ata që ende presin mysafirë nuk presin interes sepse as qytetarët nuk kanë disponim për të festuar.
Një javë deri në natën e ndërrimit të viteve, objektet hoteliere në Ohër dhe Strugë janë gjysmë të mbushura. Ata që nuk janë mbyllur ende për shkak të krizës ekonomike dhe energjetike, bëjnë të ditur se nuk e mbajnë mend deri më tani një interesim kaq të dobët për pritje të vitit të ri. Problem shtesë tani janë edhe çmimet më të larta të aranzhimeve për Vitin e Ri, që janë deri në 40%. Ato lëvizin nga 250 deri në 300 euro për person. Shoqata Hotelierike shpreson që rezervimet të arrijnë në momentin e fundit.
„Po, kemi rritje të çmimeve, por rritja e çmimeve është për shkak të rritjes së çmimit të energjisë, ushqimit, pagave dhe produkteve të tjera. Por, ne jemi ende oferta më e lirë në Ballkan dhe kudo, sepse shohim që në qendrat e skijimit për disa ditë çmimi i pritjes është deri në 1000 euro për person”, tha Kërste Blazheski-kryetar i HOTAM-it.
Në disa nga hotelet nuk do të ketë fare pritje. Ata do të punojnë vetëm me mysafirë që dëshirojnë të qëndrojnë te ta.
Shumica e rezervimeve pranë Liqenit të Ohrit janë me mysafirë vendas, por edhe nga Bullgaria, Serbia, Mali i Zi dhe Shqipëria. Për dallim nga Struga, ku nuk do të ketë festë të organizuar të Vitit të Ri në ambient të hapur, në Ohër do të ketë. Ndërkohë, 30% e hoteleve tashmë janë të mbyllura, dhe ka një njoftim për edhe aq mbyllje, menjëherë pas Vitit të Ri.
