Pas arrestimeve të fundit në Tiranë dhe Sarandë në kuadër të operacioneve të Policisë Shqiptare për të kapur trafikantët e drogës, ka reaguar Ministri i Brendshëm Taulant Balla.
Ai tha se janë shënuar rezultate konkrete nga Policia, por në ditët e ardhshme pret më shumë sukses, duke u goditur “kokat” e grupeve kriminale sa më shpejt.
“Policia e Shtetit po godet rrjetet e shpërndarësve të lëndëve narkotike duke shënuar rezultate konkrete, siç janë aksionet e fundit në Tiranë dhe Sarandë. Ndërsa pres më shumë rezultate në ditët e ardhshme, ripërsëris domosdoshmërinë që të shkohet tek “kokat” e këtyre grupeve kriminale sa më shpejt”, shkroi Ministri në Facebook.
Përndryshe sot në Tiranë arrestuar tre persona në flagrancë të cilët dyshohen se shisnin kokainë, ndërsa në veturën ku ishin u sekuestruan 1 kilogramë e 52 gramë lëndë e dyshuar kokainë, 1mijë e 400 euro, 78 mijë e 900 lekë (728 euro), dhe katër aparate celulare.
“Nga verifikimet e kryera ka rezultuar se këta shtetas, në bashkëpunim me njëri-tjetrin, siguronin lëndë të dyshuar narkotike të llojit kokainë dhe më pas furnizonin disa rrjete shpërndarësish, në rrugën “Myslym Shyri”, në Rrugën e Durrësit dhe në zonën e 21-Dhjetorit”, shkruan Policia Shqiptare.
Arrestimi është bërë në kuadër të operacionit “Three stars”, që ka për synim goditjen e veprimtarisë kriminale në fushën e narkotikëve.
