Policia e Shtetit ka bërë të ditur se ka sekuestruar një sasi medikamentesh mjekësore, lëndë e ndaluar pesticide dhe shishe me verë në Portin e Vlorës.
Në njoftim bëhet e ditur se është vënë në pranga drejtuesi i automjetit që tentoi t’i kontrabandonte mallrat.
Sipas Policisë, 32-vjeçari që drejtonte automjetin është me precedent të mëparshëm penal.
“Shërbimet e PKK Port Vlorë, në bashkëpunim me specialistët e Seksionit për Hetimin e Krimeve Ekonomike dhe Financiare të DVP Vlorë dhe autoritetet doganore në këtë port, në vijim të kontrolleve për goditjen e paligjshmërisë, bazuar në analizën e riskut dhe në kontrollet me përzgjedhje, në hyrje të RSH-së, kanë kaluar në vijën e dytë, për kontroll më të imtësishëm, furgonin me drejtues shtetasin E. Ç.
Gjatë kontrollit të ushtruar në këtë furgon, shërbimet e Policisë gjetën dhe sekuestruan kuti me medikamente mjekësore, kuti me lëndë të ndaluar pesticide dhe kuti me shishe vere, pa faturë blerjeje”, thuhet në njoftim.
Në përfundim të veprimeve, specialistët e Seksionit për Hetimin e Krimeve Ekonomike e Financiare të DVP Vlorë arrestuan në flagrancë shtetasin E. Ç., 32 vjeç, banues në Lushnjë, për veprat penale “Kontrabanda me mallra për të cilat paguhet akcizë”, “Kontrabanda me mallra të ndaluara” dhe “Kontrabanda me mallrat e licencuara.”
Materialet i kaluan Prokurorisë, për veprime të mëtejshme.
