Gjykata Supreme e Kosovës ka refuzuar mbrojtjen e katër deputetëve të Kuvendit të Kosovës për hedhjen e gazit lotsjellës në brenda seancës plenare të Kuvendit.
Albin Kurti, Donika Kadaj Bujupi, Albulena Haxhiu dhe Faton Topalli, ishin dënuar nga Gjykata e Themelore me burgim, ndërsa mbrotja e tyre, e cila është caktuar nga shteti, kishte bërë ankesë për dënimin në Gjykaten e Apelit, por kjo e fundit i ka cilësuar si të pa baza argumentet dhe ankesat e mbrojtjes.
Në dokumentin e siguruar, paneli që ka dhënë vendimin është në përbërje të Nesrin Lushtës, Valdete Dakës dhe Agim Maliqit.
Sipas njoftimit kërkesa refuzohet si e pabazuar.
Gjykata Themelore i ka shpallur fajtorë katër deputetët: Albin Kurti, Donika Kadaj-Bujupi, Faton Topalli dhe Albulena Haxhiu.
Për përdorim të armës, deputeti Albin Kurti është dënuar me 1 vjet e 3 muaj burg, për pengim të personit zyrtar me 6 muaj burg. Dënimi unik: 1 vjet e 6 muaj burg.
Dënimi është me kusht me periudhë verifikimi 2-vjeçare.
Deputetja Albulena Haxhiu për përdorim të armës është dënuar me 1 vit e 2 muaj burgim. Për pengim të personit zyrtar me 4 muaj. Dënimi unik: 1 vit e 3 muaj.
Donika Kadaj-Bujupi për përdorim të armës është dënuar me 1 vit e 3 muaj, për pengim të personit zyrtar me 6 muaj burgim. Dënim unik: 1 vit e 6 muaj.
Ndërsa, deputeti Faton Topalli për përdorim të armës është dënuar me 1 vit burgim dhe për pengim të personit zyrtar me 3 muaj burg. Dënimi unik: 1 vit e dy muaj.
Të gjitha këto dënime janë me kusht me periudhë verifikimi 2-vjeçare.
Të katër deputetët e Kuvendit të Kosovës akuzohen për hedhje të gazit në seancën e Kuvendit të Kosovës me qëllim të pengimit të ratifikimit të Marrëveshjes së Demarkacionit me Malin e Zi dhe Marrëveshjen për Bashkësinë e komunave me shumicë serbe.