Nën moton kundër “PANhajnisë”, Vetëvendosje mbajti sot tubime me qytetarë në Podujevë, Vushtrri e Mitrovicë.
E përkrahje gjeti pikërisht nga një kryetar që është pjesë e një partie që është në koalicionin qeverisës, nga ai i Mitrovicës, Agim Bahtiri.
Madje ai dha edhe deklaratë.
“Kësaj radhe nuk guxojmë me leshu pe, të bëhemi bashkë t’i largojmë njerëzit që e dëmtojnë këtë vend dhe ky vend meriton Albin Kurtin në krye, puna e palodhur e tij dhe njerëzit që e rrethojnë atë duhet t’i japim mbështetje. Unë vij nga tjetër parti por nuk njoh parti kur është në cështje kombi” deklaroi Bahtiri.
Ndërsa i pari i Vetëvendosje, Albin Kurti, përsëri theksoi se Qeveria duhet të bie.
“Nuk mund të fitojë edhe PANhajnia edhe popullsia. Le të fitojë popullsia e le të mbarojë PANhajnia. VV e LDK po bashkëpunojnë me mirë sesa partitë e koalicionit qeverisës. Kuvendi nuk është përfaqësues. Zgjedhjet janë zgjidhja”, tha Kurti.
