Partia Socialdemokrate mbështet protestën e organizuar nga Bashkimi i Sindikatave të Pavarura të Kosovës me rastin e 1 Majit- Ditës ndërkombëtare të punëtorëve.
“Kjo ditë i gjen punëtorët në Kosovë të shfrytëzuar e të shtypur. Ata janë më të keqpaguarit e më të keqtrajtuarit. Paga minimale është më e ulëta në rajon, sigurimet shëndetësore mungojnë, kurse siguria në punë është nën çdo normë të lejueshme. Shkalla e lartë e papunësisë i ka bërë të papunët armë shantazhi kundër organizimit të punëtorëve. Radha e gjatë e punëtorëve jashtë marrëdhënieve të punës ndikon në vet marrëdhëniet e punës duke displinuar punëtorët. Në anën tjetër, aty ku më se shumti duhet organizimi sindikal, në sektorin privat, në ndërtimtari e shërbime, ai mungon”, thuhet në deklaratë.
PSD konsideron se dialogu trepalësh minohet e sabotohet vazhdimisht dhe është vetë Qeveria ajo që po e saboton dhe e shpërfillë Këshillin Ekonomiko-Social.
“Shteti në Kosovë nuk është arbitër që kujdeset për ta paqtuar kontradiktën midis punës e kapitalit, duke qëndruar herë mbi palët, herë midis tyre. Ai shërben, pa pra e pa ekuivoke. Është në anën e tyre. Punëtorët e kanë njëri-tjetrin, bashkimin-solidaritetin”, përfundon deklarata.
