Këshilltarja politike e ministrit të Punëve të Brendshme, Ekrem Mustafës, Myzejene Selmani, e ka komentuar deklaratën e presidentit serb Aleksandër Vuçiq.
Ish-deputetja e AKR-së, thotë se, presidenti serb dëshiron të fitojë kohë duke luajtur rolin e viktimës.
“Ai pas takimit të Berlinit e di që për çdo sulm verbal do të bartë llogarinë. Ai tashmë sulmin e ka kthyer në viktimizim”, shkruan Selmani në Facebook, transmeton gazeta “Bota sot”.
Sipas Selmanit, Vuçiqi viktimizimin e sheh nga presionet e vendeve perëndimore.
"Plani i Vuçiqit ta ngrijë dialogun.
Deklarata e Presidentit serb Vuçiq se nuk mund të kalojë ajo çfarë ka ofruar nuk duhet marrë si dorëzim para realitetit të krijuar tashmë e 20 vite në Kosovë. Ai në fakt duke i dhënë peshë kësaj çështjeje ne opinionin e brendshëm dëshiron të fitojë në kohë duke luajtur rolin e "viktimës". Ai pas takimit të Berlinit e di që për çdo sulm verbal do të bartë llogarinë. Ai tashmë sulmin e ka kthyer në viktimizim. Madje ai viktimizim e sheh nga presionet e vendeve perëndimore! Sepse vetëm në këtë mënyrë ai mban vijën e ashpër ndaj Kosovës në agjendën shtetërore të Serbisë. Në planin e brendshëm i servon opinionit publik se vendet perëndimore nuk po lejojnë asgjë, ndërkohë që çfarëdo lëvizje e favorshme dëshiron ta shndërrojë në fitoren e tij. Kjo të rikujton atë thënien e famshme "shqelmit të fundit duhet ruajtur"", shkruan Selmani.