Deputeti i AAK-së, Blerim Kuçi ka qenë i ftuar mbrëmë në Televizionin 7, në emisionin “DPT Te Fidani”.
Kuçi ka folur për mocionin e opozitës për Qeverinë Haradinaj dhe aktvendimin e Gjykatës Kushtetuese rreth Ekipit Negociator për dialog me Serbinë, ku ky ekip i përbërë nga Fatmir Limaj dhe Shpend Ahmeti u shpall jokushtetues.
Deputeti tha se ekzekutivi, përkatësisht Kryeministri Haradinaj nuk ka bërë shkelje kushtetuese që i ka dhënë kompetencat e dialogut Presidentit Hashim Thaçi
“Kryeministri Haradinaj, nuk duhet me dhënë dorëheqje, ajo është çështje personale por normalisht që nuk duhet” tha Kuçi.
Kuçi u pyet se a është i pranuar vendimi i Gjykatës Kushtetuese për AAK-në.
“Normalisht që është i pranueshëm, ne duhet me u mësu që vendimet e Gjykatës Kushtetuese për neve janë amin, janë formë e kryer”
Blerim Kuçi u shpreh se edhe pa përkrahjen e PSD-së, Qeveria Haradinaj do ta qojë mandatin deri në fund.
“Ne asnjëherë se kemi pasë lehtë, prej momentit të parë Qeveria Haradinaj asnjë ditë nuk e ka pasë lehtë, por Qeveritë që janë në prag të votave të nevojshme, jetëgjatësia e tyre është me e madhe, kemi pasur qeverinë e kaluar që ka pasur 90 vota dhe e pat jetën mjaft të shkurtër, prandaj mendimi im është që kjo Qeveri ka me shku deri në fund” tha Deputeti i AAK-së.
