Kryeministri në dorëheqje, Ramush Haradinaj është kthyer sonte nga Haga në Kosovë, pas intervistimit nga Gjykata Speciale
Haradinaj përmes një postimi në Facebook, ka thënë se pafajësinë e tij nuk mund të vë në pikëpyetje askush.
Ai ka paralajmëruar se nesër do të vazhdojë me punë edhe pas dorëheqjes, pasi sipas tij, Kosova nuk mund t’i bartë pasojat e vakuumit qeverisës, përcjell Bota sot.
Haradinaj ka ftuar palët që mendojnë ndryshe nga ai, që t’i drejtohen Gjykatës Kushtetuese, duke thënë se cilido që të jetë vendimi i saj, do ta respektojë.
Kujtojmë se Haradinaj është kritikuar për parlajmërimin e tij se nesër do të mbajë mbledhje të Qeverisë, të cilën e rrëzoi vet të premten e kaluar, pas ftesës nga Gjykata Speciale:
Postimi i Haradinajt:
Të dashur qytetarë,
Sapo u ktheva nga Haga, e nesër vazhdojmë me punë. Pas dorëheqjes sime kam kryer obligimin ligjor pranë Prokurorisë së Dhomave të Specializuara. Pafajësinë time nuk mund ta vë në pikëpyetje askush. I kthehem obligimeve të mia në Kosovë. Vendimi im për dorëheqje dhe veprimet e mia të fundit janë porosi se çfarëdo abuzimi ndaj Kosovës, që vjen, nuk do të na lëkundë nga e drejta jonë sovrane. Kufijtë e Kosovës nuk guxon t’i prekë askush. Kosovës nuk mund t’i imponohet Dodik Republika. Tregu për njohje po, e taksa deri në njohje. Dialog pa kushte, po menjëherë.
Të dashur qytetarë,
Dëgjoj zëra se kryerja e detyrave qeverisëse pas dorëheqjes, është jo kushtetuese. Si Qeveri në dorëheqje, ashtu siç e kam cekur edhe në vendimin tim për dorëheqje, do t’i kryejë detyrat, se nuk guxoj të lë vakuum qeverisës, sepse Kosova nuk mund t’i bartë pasojat e vakuumit qeverisës. Me respekt për ta, palët që mendojnë ndryshe i ftoj t’i drejtohen Gjykatës Kushtetuese. Çfarëdo që të jetë vendimi i Gjykatës Kushtetuese do ta respektoj.
Na priftë e mbara!
RH