Kryeministri në largim Ramush Haradinaj, ka thumbuar ashpër presidentin e Kosovës, Hashim Thaçin.
Haradinaj përmes një postimi në Facebook shkruan se, shteti jonë është përcaktuar të ndërtohet në demokraci dhe mbi bazën e vlerave euro-atlantike, duke shtuar se kontrata e secilit lider me popullin dhe shtetin, është kontratë me Kushtetutën dhe ligjet që e zbatojnë vetëm liderët dhe udhëheqësit e qëndrueshëm.
Haradinaj indirekt në këtë postim ka sulmuar edhe Thaçin, ku shton se, nënshtrimi për interesa personale dhe grupore si dhe kompromiset dhe politikat e paqëndrueshme, që bien ndesh me interesat vitale të shtetit sjellin pasoja tragjike për vendin dhe të ardhmen.
Ja postimi i plotë nga Ramush Haradinaj:
Të dashur qytetarë,
Si Kosovë, jemi përcaktuar që shtetin tonë ta ndërtojmë në demokraci dhe mbi bazën e vlerave euro-atlantike.
Rrjedhimisht, kontrata e secilit lider me popullin dhe shtetin, është kontratë me Kushtetutën dhe ligjet. Këtë kontratë, e zbatojnë vetëm liderë dhe udhëheqës, të qëndrueshëm, të cilët para çdo interesi personal, e kanë parësor shtetin dhe qytetarin!
Qëndrueshmëria e bazuar në të drejtën dhe konsistenca në politikbërje, e forcon integritetin dhe sovranitetin e Kosovës dhe e bënë ndryshimin. Nënshtrimi për interesa personale dhe grupore, kompromiset dhe politikat e paqëndrueshme, që bien ndesh me interesat vitale, nacionale dhe shtetërore, sjellin pasoja tragjike për vendin dhe të ardhmen tonë!
Vetëm demokracia dhe vullneti i qytetarëve, mund dhe duhet ta sfidojë secilin liderë, duke ia përcaktuar të ardhmen politike.
RH