Mbrëmë pas debatit të ashpër në Pressing në T7, ka ndodhur një përplasje fizike mes kandidatit për deputet nga Lëvizja Vetëvendosje Haki Abazi dhe atij të PSD-së Dardan Molliqaj.
Policia sot ka konfirmuar ngjarjen, të cilën e ka konsideruar si “sulm”, duke bërë të ditur se po e heton rastin.
Në lidhje me ngjarjen e mbrëmshme, ka reaguar edhe analisti politik Vigan Qorrolli.
Ai në një shkrim në Facebook, ka thënë se dhuna përdoret në politikë, për ta bërë kundërshtarin më të pasigurt në realizimin e qëllimeve të tij.
Qorrolli ka paralajmëruar dhunë politike deri në fund të vitit 2019 e më tej, përcjell Bota sot.
Reagimi i plotë i Qorrollit:
Dhuna si mjet politik
I lejuar ose jo dhuna është mjet jokonvencional i politikës për ta bërë kundërshtarin më të pasigurtë në realizimin e qëllimeve të tij.
Ditëve dhe muajve të fundit ka shumë dhunë në Kosovë. Do ketë deri në fund të vitit 2019, e madje edhe përtej. Dhunë verbale, psikologjike, deri tek ajo më e frikshmja, që për taksirat po u ngjan disa fytyrave publike, dhunë fizike. Rrahje, grushtime, e kanosje.
Shkencëtarët e moralit publik (politikanët) kanë merita të shumta. Më e madhja meritë është rritja e apetitit për dhunë.
Këtë e bëjnë me lotë krokodili, me patriotizëm, me hipokrizi e me keqpërdorim njerëzish.
Medemek rrejnë, koketojnë dhe në fund prodhojnë dhunë politike! Nxisin rrahjen e burrave dhe grave - të patrembur nga frika e "dhunës shtetërore": domethënë policisë, prokurorisë dhe gjykatës.
Tri palët e fundit janë në gjumë të thellë - si pasojë e kontrollit të fortë politik - që e kanë mbi kry.
