Kandidati për kryeministër të qeverisë së ardhshme të Kosovës nga Partia Demokratike e Kosovës, Kadri Veseli gjatë takimit me fermerët e komunës së Prizrenit ka shpalosur programin e tij për zhvillim ekonomik dhe bujqësi me ç'rast ka ofruar rritje të granteve dhe subvencioneve për prodhuesit e qumështit dhe verërave, dhe rritjen e kapaciteteve të ujitjes në gjithë territorin e Kosovës deri në 50 për qind.
Veseli ndër të tjerash para fermerëve dhe bujqve prizrenas tha se programi i tij përfshin edhe luftën kundër korrupsionit dhe nepotizmit si mundësi për zhvillim të ekonomisë së dijës dhe ndërmarrësisë.
I pari i PDK-së premtoi thjeshtësim të procedurave dhe ofrim të subvencioneve në periudhën e fillimit të prodhimit, derisa theksoi se nuk do ketë tatime shtesë dhe se tatime ekzistuese nuk do zvogëlohen.
Veseli: Fermerët do ta kenë PDK-në partnere
"Nuk keni me pas e as nuk keni pas partnerë më shumë sesa Partia Demokratike e Kosovës ju fermerët në Kosovë do iu përkrahi për katër vitet e ardhshme shumë më shumë edhe më fuqishëm drejtpërdrejt, konkret në të gjitha segmentet në të cilat janë do rriten subvencionet në bazë të rendimentit dhe në bazë të standardeve të Bashkimit Evropian. Do të fuqizohen grantet dhe do orientohen, bujqësia në Republikën e Kosovës gradualisht duhet të kaloj në një agro industri.... Nuk ka me pas asnjë tatim të ri kanë me u zvogëlua edhe tatimet ekzistuese, kemi me i ul normat e pagesave të cilët janë çoftë në fitim në të gjitha aspektet vetëm me e rrit ndërmarrësinë", tha Veseli.
Kandidati për kryeministër të ardhshëm të Republikës së Kosovës, Kadri Veseli tha se do përkrahë fermerët duke krijuar deri në katër apo pesë qendra grumbulluese, me qëllim që të ruhen më kujdes prodhimet e tyre.
Kryetari i PDK-së, Kadri Veseli tha se do e mbroj prodhimin vendor duke rritur çmimet për litër të qumështit si dhe heqjen e akcizës për verërat. Ai po ashtu para fermerëve të Prizrenit premtoi edhe rrjete të kapaciteteve të ujitjes në tërë Kosovën në 50 për qind.
Veseli: Do të risim çmimin e qumështit vendor dhe do të heqim akcizën për verërat
"Kemi me e rrit në minimun në 50 për qind kapacitetet e ujitjes në Republikën e Kosovës për Rahovecin e kam dhënë fjalën brenda jo katër viteve por tri viteve ka me pas ujitjen çdo tokë bujqësore e komunë së Rahovecit. Kemi me e rrit sistemin e Iber Lepencit është projekt me Bankën Botërore... Kanë me u rrit edhe subvencionet kanë me u rrit deri jo krejt kategoritë e qumështit deri në 10 cent për litër nëse janë dy, katër, gjashtë, kanë me qenë gjashtë, tetë, dhjetë cent për litër qumështi. Për industrinë e përpunimit të rrushit po ashtu për verat do hiqet akciza", deklaroi kandidati për kryeministër nga PDK.
Ndër të tjerash Veseli ka ofruar edhe subvencionim të kontratave të punës me qëllim të realizimit të kontratës 100 për qind për punëtorët në sektorin privat.
Ndërsa, drejtori i "Abi SHPK", Irfan Fusha si nikoqir tha se fabrika e tij pa bashkëpunëtorët e saj nuk do mund të gëzonte sukseset që ka.
Fusha: Pa bashkëpunëtorët nuk do t’i gëzonim sukseset
"Kemi bashkëpunëtor, fermerë, bujq, blegtorë por edhe punëtorë të cilët na sjellin lëndën e parë dhe këta pastaj e përpunojmë dhe e shesim në tregun e brendshëm por edhe në te jashtëm", tha ai.
