Kryeministri i Kosovës në dorëheqje, Ramush Haradinaj, ka komentuar votimin e sotëm të Komisionit për Drejtësi, Punë të Brendshme dhe Liritë Qytetare (LIBE) për heqjen e regjimit të vizave për qytetarët e Kosovës.
Ai përmes një postimi në Facebook, ka shkruar se “ndonëse votim i përsëritur për të dytën herë, i gëzohem përkrahjes, që legjislatura e re e BE-së vazhdon t’i jap Kosovës në këtë të drejtë tashmë të fituar”.
Postimi i plotë:
Me gjithë vonesat dhe diskriminimin ndaj Kosovës, është për t’u përshëndetur votimi i sotëm i Komisionit për Drejtësi, Punë të Brendshme dhe Liritë Qytetare (LIBE) për procesin e rinisjes së negociatave ndërinstitucionale me Këshillin e Bashkimit Europian për heqjen e regjimit të vizave për qytetarët e Kosovës.
Ndonëse votim i përsëritur për të dytën herë, i gëzohem përkrahjes, që legjislatura e re e BE-së vazhdon t’i jap Kosovës në këtë të drejtë tashmë të fituar.
Kosova dhe qytetarët e saj, presin që me të njejtën përkrahje do të përsëritet edhe votimi i nevojshëm në Parlamentin Europian, dhe përfundimisht në Këshill, që të hapen rrugët e shkëmbimeve kulturore, akademike, e turistike me Europën edhe për qytetarët e Republikës së Kosovës.
RH