(E plotësuar) - Lëvizja Vetëvendosje zgjodhi sheshin “Skënderbeu” për të festuar fitoren e 6 tetorit. Fillimisht, nënkryetari i partisë, Glauk Konjufca deklaroi se kjo fitore ishte historike.
Sipas tij, edhe në të kaluarën ka pasur parti që kanë fituar, por asnjëherë, asnjë parti nuk ka fituar si Lëvizja Vetëvendosje pa futur në punë njerëz, pa dhënë tendera e pa hapur konkurse.
Ndërsa, kryetari i Lëvizjes Vetëvendosje, Albin Kurti, tha se me fitoren e partisë së tij hapet një kapitull i ri për vendin, fitore të cilën ai e ka quajtur më shumë si të popullit se sa të partisë.
Ai tha se më Vetëvendosjen në qeveri, nuk do të ketë vend për hajna dhe këta të fundit tashmë do të hetohen e gjykohen dhe se i pret jetë e vështirë deri në humbjen e lirisë.
Kurti: Hajnat do të luftohen, hetohen e gjykohen
“Tash e hapim një kapitull të ri për Republikën tonë, me faqe të bardhë e me zemër të ngrohtë sepse ju jeni ata që na keni sjellë sonte në këtë binë e në qeveri pas fitores së madhe që sërish është më shumë e juaja sesa e jona. Me qeverisjen tonë nuk ka më hajna në qeveri, nuk ka më hajna në institucione, por me shtetin e së drejtës hajnat do të luftohen, hetohen, gjykohen, dënohen edhe në shoqëri, kudo që janë. Jeta e ndershme do të jetë e kollajshme, jeta e kriminelëve do të jetë vështirë deri në humbjen e lirisë”, deklaroi Kurti.
Kurti falënderoi edhe kandidatët e tjerë për kryeministra, e në veçanti pati fjalë të mira për kandidaten e LDK-së, Vjosa Osmanin, për të cilin tha se ka inspiruar shumë femra që të jenë të angazhuara në politikë.
Ai tha se me Osmanin synon që të bashkëpunojë edhe në qeveri, pasi ndryshimi i vërtetë do të ndodhë kur në qeverisje të vijë opozita e djeshme.
Po ashtu, Kurti tha se do të bashkëpunojë ngushtë me faktorin ndërkombëtar dhe me partnerët strategjikë të vendit pasi sipas tij, Kosova ka nevojë për miq.
Kurti: Ndryshimi ndodhë kur opozita bëhet qeveri
“Ne konsiderojmë që ndryshimi i vërtetë demokratik është kur opozita bëhet qeveri, opozita ka fituar bindshëm dhe kësaj fitore, dhe këtij ndryshimi opozitar i prinë Lëvizja Vetëvendosje dhe unë si kryeministër i ri i Republikës së Kosovës. Si kryeministër i Kosovës do të bashkëpunoj ngushtë me faktorë ndërkombëtarë, me ata që na njohin pavarësinë e na kanë ndihmuar ngaherë, me SHBA-në, me BE-në, NATO-n, me Gjermaninë, Britaninë e Madhe, Francën e Italinë por edhe shtetet e tjera që neve na kanë mbështetur edhe na jenë gjend si në kohë luftë e në kohë paqe, pra unë do të jem partner me partnerët dhe aleat me aleatët sepse shteti ynë ka nevojë për miq, për përkrahje, ka nevojë për ndihmë”, tha Kurti.
Pas Kurti, fjalën para mbështetësve të Lëvizjes Vetëvendosje e morën edhe funksionarë të lartë të partisë dhe kandidatë për deputetë.
Kurti shpall fitoren: Unë kryeministër, me LDK-në kurorëzojmë ndryshimin
Kryetari i Lëvizjes Vetëvendosje, Albin Kurti, ka shpallur fitoren e subjektit të tij pak para se t’i bashkohej festës në sheshin “Skënderbeu”. Para selisë qendrore të VV-së, Kurti tha se këto zgjedhje janë historike të cilat e çlirojnë Kosovën për së brendshmi nga uzurpatorët e ngjyrave dhe krahëve të ndryshëm.
Ai tha se e gjithë angazhimi dhe sakrifica ia ka vlejtur për popullin dhe nga nesër fillon puna për të formuar qeverinë e re e cila do të punojë për të mirën e vendit dhe të rikuperojë, sipas tij, kohën e humbur nga të tjerët.
Kurti e përsëriti se nga nesër do të fillojë kontaktet me Lidhjen Demokratike te Kosovës në mënyrë që të formohet qeveria e re dhe të kurorëzohet ndryshimi.
Kurti: Me LDK-në kurorëzojmë ndryshimin
“Qysh nesër do të vendosi kontakte me Lidhjen Demokratike të Kosovës në mënyrë që me subjektin me të cilin ishim në opozitë ta kurorëzojmë ndryshimin që të bëhemi qeveri. Kur opozita bëhet qeveri atëherë kurorëzohet ndryshimi. Ndërkohë që ndryshimi politik tashmë ka ndodhur dhe mban datën e 6 tetorit 2019. Shumë brez e gjenerata do ta kujtojnë këtë datë si festë të demokracisë si festë, si datë e çlirimit të brendshëm nga uzurpatorët e krahëve të ndryshëm por që na e dobësuan shtetin e kapën atë”, tha Kurti.
I pyetur nëse Lëvizja Vetëvendosje do të pranonte një tjetër partner në koalicion për të qeverisur përpos LDK-së, Kurti tha se nuk do të hedhin hapa të shpejtë dhe se fillimisht do të diskutohet me Lidhjen.
Ai shtoi se gjatë kohës që ishin në opozitë kanë pasur bashkërendim të aktiviteteve, porse për fatin e keq ajo nuk u konkretizua në një koalicion parazgjedhor.
Kurti: LDK-së ia shtrij dorën e bashkëpunimit si kryeministër
“Me Lidhjen Demokratike të Kosovës kemi pasur bashkërendim të mirë opozitar, është për të ardhur keq që nuk e shndërruam në projekt të përbashkët me koalicion parazgjedhor siç pata propozuar unë, megjithatë jemi ku jemi dhe unë ua shtrij dorën e bashkëpunimit si kryeministër i Kosovës pas këtyre zgjedhjeve me peshë historike”, tha ndër të tjera Kurti.
