Kryetari i Komunës së Kamenicës njëherësh nënkryetar i PSD-së, Qëndron Kastrati ka sqaruar edhe për rastin e hapjes së kazinove në Kamenicë pavarësisht se në Kosovë janë të ndaluara me ligj.
Kastrati në “Personale” ka thënë se një gabim i vitit 1999 kur NATO dhe forcat serbe kanë ndarë territorin e përgjegjësisë në hartat kadastrale ka lënë një pjesë të Karaçevës si zonë neutrale.
I pari i Kamenicës thotë se ndër vite i është kërkuar edhe policisë së Kosovës të mos operojë në atë pjesë duke krijuar një boshllëk në atë vend.
“Ajo zonë është e Komunës së Kamenicës dhe me kadastër iu takon pronarëve shqiptarë. Sfida është që Policia e Kosovës për të hyrë në atë zonë duhet të merr leje të veçantë nga KFOR-i”.
Kastrati thotë se disa shqiptarë që kanë ardhur nga gjithë Kosova kanë hapur kazino në atë vend duke përfituar nga boshllëku që policia nuk mund të intervenojë.
Kryetari i Kamenicës thotë se nuk është i gatshëm të urdhëroj zyrtarët komunal të shkojnë në inspektim pa asistimin e policisë në atë vend dhe se është në pritje të sqarimit të kompetencave nga organet tjera qendrore.
