Ministri i Infrastrukturës dhe Ambientit, Lumir Abdixhiku ka shuar zërat kritik të opozitës të cilët po bëjnë propagandë të ashpër për shkak të ndalesës së 50 milionë eurove për Bechtel-Enken.
Pas këtij vendimi kishte reaguar ashpër opozita e cila thoshte se po mbesin banorët e Vitisë pa kyçje në autostradë.
Abdixhiku thotë se qasja e Vitisë në autostradë është garantuar edhe me Vendimin e Qeverisë Mustafa.
Ai thotë se edhe në programin Qeverisës LDK-LVV është paraparë kyçja në autostradë.
Shkrimi i plotë:
Siç edhe ndodh me secilin vendim tjetër të Qeverisë sonë, opozita e zënë ngushtë e pa argument, e provon propagandën. Dhe propaganda e radhës qenka se me ndalesën e 50 milionëshit të djeshëm, ne i kemi lënë banorët e regjionit të Vitisë pa qasje në autostradë. Si arrijnë në këtë përfundim?!
Qasja e Vitisë në autostradë garantohet me Vendimin e Qeverisë Mustafa të marrë 3 vite më parë. Vendimi i anuluar i djeshëm është krejt tjetër - i qeverisë PAN; që përveç se parapërcaktonte në mënyrë arbitrare një firmë të bënte këtë punë, e bënte me çmim plot 50 milionë euro më shumë. E merrni me mend sa kyçja e sa puna bëhet me këtë shumë?
Kyçjen në Gërlicë të Vitisë e kemi paraparë edhe në programin qeveritar LDK-LVV; kapitulli i 8-te, faqe 32. Për dallim prej fjalëve të qeverisë së shkuar, ne do ta bëjmë këtë punë në këtë mandat. Më mirë e më lirë; më drejtë e më pastërt.
