Kërkohet largimi i kryeministrit Hoti: Theu protokollin, mund të ketë infektuar qytetarët e Dragashit

Aktuale

Kërkohet largimi i kryeministrit Hoti: Theu protokollin, mund të ketë infektuar qytetarët e Dragashit

Nga: A.Zh Më: 3 gusht 2020 Në ora: 07:19
Kryeministri i Kosovës, Avdullah Hoti, gjatë vizitës së djeshme në Dragash

Deputetja e Grupit Parlamentar të Lëvizjes Vetëvendosje Mimoza Kusari-Lila, i ka uruar shërim të shpejtë nga Koronavirusi kryeministrit Avdullah Hoti.

Por, Kusari-Lila ka kritikuar ashpër kryeministrin se ka thyer protokollin, pasi sipas saj, pas testimit, Hoti ishte në terren, duke rrezikuar njerëzit e tjerë dhe bizneset në Dragash.

Deputetja ka thënë se asnjëri prej tyre nuk e kishte borxh që ta merrte virusin nga kryeministri, përcjell Bota sot.

Sipas saj, Hoti është dashur të vet-izolohej.

Ajo ka theksuar se Hoti me sjelljen e tij, u ka dhënë arsye për ta shkarkuar, derisa atij i ka bërë thirrje të dorëhiqet, përcjell Bota sot.

“Uroj asnjë tjetër mos të ketë virusin, ndërsa ju me sjelljen tuaj pasi të jeni shëndoshë na keni dhënë edhe një arsye për të ju shkarkuar. Ndërsa, do të ishte shumë e duhur, sikur ju dhe qeveria të jepni dorëheqje vetë, të paktën do kishim një bindje se më në fund e kuptuat përgjegjësinë dhe jo përgjegjshmërinë tuaj”, ka shkruar Mimoza Kusari-Lila në Facebook.

Reagimi i saj i plotë:

Mirëmëngjesi Kosovë,

E Hënë, ditë e re dhe javë e re.

Lajmi i mbrëmjes, z. Avdullah Hoti doli pozitiv me virusin Covid - 19. Ky lajm nuk është ndonjë çudi. Tanimë virusin e kemi mes nesh dhe secili mund të jetë personi i radhës i infektuar kur nuk i respekton udhëzimet e IKSHPK-së.

Me këtë rast z. Hoti i uroj shërim të shpejt dhe kthim në detyrën e tij nga e cila shpresoj se i shëruar dhe i fortë do të largohet së shpejti!

Arsyet për këtë largim po rriten çdo ditë e më shumë.

Pasi nuk u ndie mirë dhe pasi pati arsye të testohet, pse nuk u izolua z. Hoti?

Pse ai bëri të kundërten e protokollit i cili sygjeron se prej testimit deri tek marrja e rezultatit, personi izolohet?

Pse z. Hoti pasi u testua doli në terren dhe takoi dhjetëra njerëz e biznese të cilët sot të gjithë potencialisht janë të rrezikuar e sigurisht disa prej tyre, nuk do t’iu ipet as mundësia për t’u testuar. Asnjëri nga ta nuk ia pat me borxh të marrë virusin nga Kryeministri.

A do të thotë kjo që në javën kur vdekshmëria nga pandemia arriti kulmin më të lartë, Kosova ka një Kryeministër që injoron protokollin, vënë në rrezik bashkëpunëtorët dhe qytetarët e vendit me vizita të paarsyeshme për kohë pandemie.

Z. Hoti, nga zemra ju uroj të shëroheni ju dhe të gjithë ata që janë të prekur nga ky virus. Gjithashtu, uroj që sa më pak të keni shpërndarë virusin tek bashkëpunëtorët që ishin me ju në vizita dhe poashtu tek ata që i vizituat.

Ju asgjë nuk keni bërë për t’a lehtësuar këtë pandemi në Kosovë që kur jeni në atë zyre, ndërsa, me dje, edhe fizikisht keni rrezikuar biznese dhe jetëra njerëzish.

Uroj asnjë tjetër mos të ketë virusin, ndërsa ju me sjelljen tuaj pasi të jeni shëndoshë na keni dhënë edhe një arsye për të ju shkarkuar. Ndërsa, do të ishte shumë e duhur, sikur ju dhe qeveria të jepni dorëheqje vetë, të paktën do kishim një bindje se më në fund e kuptuat përgjegjësinë dhe jo përgjegjshmërinë tuaj.

Shëndet e qofshin të shkuara këto ditë!

commentFirst article
Sot mund të lexoni Shfletoni kopertinat