Ministria e Shëndetësisë ka marrë vendim që edhe institucionet shëndetësore private të kryejnë teste për koronavirus.
Njëra nga klinikat e licensuara është “Prolab” në Prishtinë, në të cilën janë kryer rreth 275 testime serologjike nga 10 gushti, kur i është dhënë licensa.
Kështu ka bërë të ditur pronari i kësaj klinike, Mentor Kurshumliu.
“Prej momentit që jemi licensuar, kemi kryer 275 testime serologjike. Rezultati del brenda ditës. Një test kushton 20 euro. Ka pasur të atillë që i kanë bërë dy teste. Prodhuesi i testeve është italian”, ka thënë Kurshumliu.
Ai po ashtu njoftoi se po raportojnë në baza ditore në Institutin Kombëtar të Shëndetësisë Publike të Kosovës.
Bordi Për Licensimin e Institucioneve Private Shëndetësore i ka licencuar 29 institucione private, të cilat nga 10 gushti kanë pasur mundësi të kryejnë testime për COVID-19.
