Ish-ministrja e Drejtësisë Albulena Haxhiu, ka bërë të ditur se në Komisionin për Legjislacion, sot do të trajtohet drafti i Kodit Civil.
Ajo më tej ka shtuar se nenet që janë të paraqitura, qeveria ka pasur për synim t'i ndryshojë, por fatkeqësishtë punët e mira që i nisëm, përkohësisht i ndalën por shumë shpejt ato do të vazhdojnë,shkruan Haxhiu në një postim në Facebook, përcjell “Bota sot”.
Postimi i plotë:
Në Komisionin për Legjislacion, sot trajtohet drafti i Kodit Civil.
Padyshim që Kodi Civil është ndër dokumentet më të rëndësishme por drafti që është proceduar në Kuvend nga Ministria e Drejtësisë nuk do të duhej të mbështetej.
Përveç tjerash, në këtë draft, në librin e katërt ku rregullohet familja, lidhur me pasurinë e përbashkët ndërmjet bashkëshortëve ka paraparë kontratën paramartesore ose martesore.
Në vend se nenet të mbeteshin sikur në ndryshimin e vitit 2019, ku pasuria ndërmjet bashkëshortëve ndahet 50/50, si dhe njihet kontributi i grave në shtëpi, tani do t'i detyrojnë çiftet të hyjnë në pazar njëri me tjetrin! Propozimi i Ministrisë së Drejtësisë, assesi nuk duhet të kalojë në Kuvend, është diskriminues dhe i padrejtë.
Po ashtu tek libri i pestë, e që rregullohet trashëgimia, nuk ka asnjë nen që e ndryshon gjendjen aktuale, ku sipas raporteve vetëm 4% e grave trashëgojnë pronë.
Kur mungon vullneti, rritet e vazhdon shtypja e diskriminimi ndaj vajzave dhe grave.
Qeveria jonë ka pasur për synim që gjitha këto nene t'i ndryshojë. Fatkeqësisht punët e mira që i nisëm, përkohësisht i ndalën por shumë shpejt ato do të vazhdojnë.
