Deputetja e Lidhjes Demokratike të Kosovës Vjosa Osmani, ka publikuar dokumentin, me të cilin vërtetohet se kryeministri Ramush Haradinaj, kishte ndikuar në punën e prokurorit të dorëhequr Elez Blakaj, i cili hetonte mashtrimet me listat e veteranëve.
Osmani në një postim në Facebook, e ka konsideruar këtë ndërhyrje të drejtpërdrejtë e të shpërfaqur në sistemin e drejtësisë.
Ajo ka theksuar se sistemit “mafioz e autokratik” në Kosovë, duhet t’i jepet fund përmes mocionit për rrëzimin e qeverisë, që duhet të hidhet në votim urgjentisht, përcjell "Bota sot".
Në rast dështimi, deputetja e LDK-së ka propozuar që të shkohet në mobilizim qytetar.
Reagimi i plotë i Osmanit:
Ndërhyrje më të drejtpërdrejtë e më të shpërfaqur në sistemin e drejtësisë se sa kur Kryeministri i kërkon prokurorit që raporti i hetimeve t’i dorëzohet atij nuk ka.
Kjo nuk ndodhë në demokraci. Kjo është tipike për sistemet autokratike e mafioze. Këtij sistemi duhet t’i jepet fund menjëherë.
Mocioni për rrëzimin e qeverisë duhet të hidhet në votim urgjentisht. Edhe nëse dështon, le të dihet sigurtë kush është për e kush kundër kësaj qeverisjeje kleptokratike e të rrezikshme. E pastaj, mobilizimi qytetar është ajo që pason.
