Ministrja e Integrimit Evropian, Dhurata Hoxha po qëndron në Austri ku po zhvillon disa takime në përpjekjet për liberalizimin e vizave. Hoxha ka qenë ministrja me premtimet më të mëdha se liberalizimi do të ndodhë këtë vit, ndërsa thotë se institucionet e Kosovës i kanë kryer detyrat e veta.
Por, vetë ministrja dy ditë më parë paralajmëroi se nëse nuk sigurohet shumica e votave të nevojshme pro liberalizimit të vizave në Këshillin e Ministrave të BE-së, atëherë votimi i paraparë në fillim të dhjetorit të këtij viti mund të shtyhet.
“Kosova i ka kryer të gjitha obligimet e veta, këtë e ka konfirmuar edhe Komisioni Evropian me rekomandim pozitiv. Askush nuk mund të mohojë kontributin e institucioneve tona”, ka thënë ministrja Hoxha.
E pyetur nga mediat vendore nëse ndjen përgjegjësi në rast se liberalizimi i vizave për Kosovën dështon këtë vit, Hoxha e ka mohuar këtë.
“Institucionet tona kanë qenë përgjegjëse për përmbushjen e kritereve dhe ne kemi përmbushur kriteret. Jam krenare për punën që kanë bërë institucionet dhe Ministria e Integrimit. Vendimarrja është e mundur të kryhet këtë vit. Askush nuk mban përgjegjësi për vullnetin politik të shteteve anëtare sepse kjo nuk varet nga ne. Krejt çka është varur nga ne, është punë e kryer”, ka thënë Dhurata Hoxha.
