Kryeministri i vendit, Ramush Haradinaj, ka mbajtur një konferencë për media pas takimit të sotëm të Këshillit Ministror për Integrim Evropian.
Haradinaj aty u pyet edhe për procesin e liberalizimit të vizave për Kosovën, ku tha se disa shtete anëtare të BE-së, hezitojnë ta fusin në rend dite këtë pikë.
“Ne kemi kaluar dy moment të rëndësishme për këtë temë. Kemi kaluar votimin në Parlament, pra tani na ka mbetur zbatimi i këtij vendimi që duhet të merret në Këshill. Qeveritë e shteteve të BE-së kanë hezitim me e fut në rend dite këtë çështje”, ka thënë Haradinaj,
Megjithatë, shtoi Haradinaj, kjo çështje ka gjasa që të hyjë në agjendë, dhe nëse ndodh një gjë e tillë sipas tij, votimi do të jetë pro.
Ndërkohë ministrja e Integrimeve Evropiane, Dhurata Hoxha tha se heqjen e vizave e kanë premtuar edhe zyrtarët e Bashkimit Evropian.
Ajo theksoi se Kosova është duke insistuar që kjo pikë të futet në agjendë, dhe se sipas saj, nga BE-ja është premtuar që me votimin e Demarkacionit, do të përfundojë edhe çështja e vizave.
