Ish komandanti i zonës operative të Llapit, Rrustem Mustafa i njohur si Remi, ka marrë ftesë nga Gjykata Speciale për datën 14 janar 2019. Këtë e ka konfirmuar avokati i tij Arianit Koci, shkruan “Bota sot”.
Ish-oficerë të lartë të Ushtrisë Çlirimtare të Kosovës të Zonës Operative të Llapit, përfshirë edhe komandantin e Zonës, Rrustem Mustafën, ishin dënuar më 2013 nga Gjykata e Prishtinës për krime lufte.
Gjykata Themelore e Prishtinës i kishte gjetur fajtorë dhe i kishte dënuar me burgim tre eprorët e lartë të UÇK-së: Latif Gashin, i njohur si “Lata”, udhëheqës i shërbimit informativ ushtarak, Rrustem Mustafën, i njohur si Remi, komandant i Zonës së Llapit dhe Nazif Mehmetin, ish-ushtrues detyre i komandantit të Policisë Ushtarake.
E pas votimit nga deputetët e Kosovës për ligjin mbi Specialen, komandant Remi kishte dalur pro kësaj Gjykate, duke thënë se kjo do të pastrojë luftën e UÇK-së dhe asesi ta njollosë atë, përcjell “Bota sot”.
Lexojeni të plotë reagimin e Remit në gusht të vitit 2015
Specialja përtej pretendimeve të periudhës së luftës!
Gjykata Speciale do të përfundojë shpejt me të përfolurat apo pretendimet e kohës së luftës, për udhëheqësit e luftës për liri.
Në Kosovë, nga ana jonë nuk ka ekzistuar asnjë plan për krime lufte.
Bota demokratike e di këtë.
Gabime individësh ndodhin kudo, por rruga e vetme që këto gabime të trajtohen si të tilla është një vendim kredibil gjyqësor nga një gjykatë kredibile.
Nga ky proces nuk dëmtohet askush,
UÇK – ja, JO,JO e JO.
Gjykata Speciale do të ketë punë më shumë me krimin e organizuar sidomos atë ekonomik i cili ka bllokuar proceset zhvillimore në vend.
Duke lejuar mundësi, janë përdorur mekanizmat e shtetit për të krijuar kapital të madh në duar të njerëzve jo meritor, monopole të cilat kanë deformuar tregun dhe kanë dëmtuar iniciativën e lirë.
Ligjshmëria duhet të shtrihet në vendin tonë dhe kjo nuk mund të bëhet pa veprimin e një mekanizmi gjyqësor të modelit perëndimor.
Unë besoj se kjo do të ndodhë, pra, do t’i hapet rruga zhvillimit të vendit dhe perspektivës për qytetarët tanë.
Gusht 2015