Presidenti Donald Trump pritet të nënshkruajë sot një urdhër ekzekutiv për mjedisin, që do të ndryshonte rregulloret për mjedisin të nënshkruara gjatë administratës së ish presidentit Obama.
Një zëdhënës i Shtëpisë së Bardhë tha se urdhëri i Presidentit do t’i kërkojë Agjencisë për Mbrojtjen e Mjedisit të rishikojë të gjithë rregulloret e përcaktuara në Planin për Energji të Pastër.
Presidenti Trump e ka cilësuar vazhdimisht si të pavlefshme politikën e paraardhësit të tij për klimën. Gjatë fushatës elektorale për president ai i cilësoi nismat e Presidentit Obama për energji të pastër “jo të mënçura”, pasi sipas tij, rregulloret çojnë në “mbylljen e vendeve të punës”.
Propozimi për buxhetin i zotit Trump për 2018 ul fondet për Agjencinë për Mbrojtjen e Mjedisit me 31 për qind, duke përfshirë një shkurtim pothuajse të plotë të fondeve për kërkime në këtë fushë.
Aktivistët për mbrojtjen e mjedisit kanë reaguar të alarmuar ndaj politikave të zotit Trump për klimën, duke u shprehur se ato po e çojnë vendin në rrugën e gabuar.