Prokurorët brazilianë po padisin gjigantin kinez të automjeteve elektrike (EV), BYD, dhe dy kontraktuesit e tij, duke thënë se ata ishin përgjegjës për trafikimin e qenieve njerëzore dhe kushte pune "analoge me skllavëri" në një vendndërtimi fabrike në vend.
Sipas BBC, Zyra Publike e Prokurorisë për Punën në shtetin e Bahia thotë se 220 punëtorë kinezë u shpëtuan pasi nisi një hetim si përgjigje ndaj një denoncimi anonim.
MPT kërkon 257 milionë real brazilianë, apo 45.5 milionë dollarë, dëmshpërblim nga tri kompanitë.
BYD nuk ka kthyer përgjigje të menjëhershme për kërkesën për koment nga BBC, por më parë ka deklaruar se ka "tolerancë zero për shkelje të të drejtave të njeriut dhe ligjeve të punës".
Autoritetet ndaluan ndërtimin e fabrikës në fund të vitit të kaluar pasi punëtorët u gjetën duke jetuar në akomodime të ngushta me "kushte minimale komoditeti dhe higjiene", tha MPT.
Disa punëtorë flinin në shtretër pa dyshek dhe një tualet ndahej nga 31 persona, thuhej në një deklaratë.
MPT gjithashtu pretendoi se stafi në vendndërtim kishte pasaportat e konfiskuara dhe punonte me "kontrata pune me klauzola të paligjshme, orare pune të lodhshme dhe pa pushim javor".
Prokurorët thanë se punëtorëve u mbaheshin deri në 70% të pagave dhe ata përballeshin me kosto të larta për të ndërprerë kontratat e tyre.
Kushtet "analoge me skllavëri", sipas ligjit brazilian, përfshijnë skllavëri me borxhe dhe punë që shkel dinjitetin e njeriut.
Fabrika po ndërtohej në qytetin Camacari në verilindje të Brazilit.
Ajo ishte planifikuar të funksiononte nga marsi 2025 dhe do të ishte fabrika e parë e BYD jashtë Azisë.
BYD, shkurt për Build Your Dreams (Ndërto ëndrrat tuaja), është një nga prodhuesit më të mëdhenj të automjeteve elektrike në botë. Në prill, ajo shiti më shumë sesa Tesla e Elon Musk në Evropë për herë të parë, sipas firmës kërkimore të industrisë automobilistike Jato Dynamics.
Kompania po kërkon të rrisë praninë e saj në Brazil, i cili është tregu i saj më i madh jashtë vendit.