Volvo ka prezantuar një lloj të ri rripi sigurimi, i cili do të debutojë në SUV-in elektrik EX60 që do të dalë së shpejti në treg.
Rripi i përmirësuar i sigurimit do të njohë madhësinë e pasagjerit dhe do të përshtatet me madhësinë e tij, në rast të një përplasjeje.
Prodhuesi suedez është një pionier në sigurinë automobilistike. Volvo ishte ndër prodhuesit e parë në histori që prodhoi makina me rripa sigurimi, fillimisht në dy pika bashkimi.
Rripi i sigurimit me tre pika, i pranishëm në të gjitha automjetet, u prezantua nga marka suedeze në vitin 1959. Tani, 66 vjet pas këtij momenti të rëndësishëm në industrinë e automobilave, Volvo po “rishpik”, domethënë, po ridizajnon dhe përmirëson rripin e sigurimit për modelet e saj të ardhshme.
Lloji i ri i rripit të sigurimit është shumë-adaptues dhe integron disa sensorë për të analizuar madhësinë e pasagjerit. Në këtë mënyrë, rripi i sigurimit do të njohë formën e trupit, gjatësinë dhe madje edhe peshën e pasagjerit në mënyrë që të reagojë në mënyrë të përshtatshme në rast të një aksidenti.
Rripi i ri i sigurimit, i zhvilluar në bashkëpunim me ZF Lifetech, do të sillet ndryshe në varësi të natyrës dhe intensitetit të përplasjes. Sistemi do të mbledhë shpejt të dhëna nga mjedisi përreth makinës, për të përcaktuar forcën që rripi do të ushtrojë mbi pasagjerët në rast të një përplasjeje.
Rripi i ri i sigurimit do të ushtrojë më shumë forcë mbi një pasagjer më të rëndë për të parandaluar lëndimet në kokë. Në të njëjtën kohë, për një person më të vogël, rripi do të ushtrojë më pak tension në rast të një përplasjeje.
Modeli i parë që do të marrë rripin e ri të sigurimit shumëpërshtatës do të jetë SUV elektrik EX60, një model që do të lansohet vitin e ardhshëm. Meqenëse rripi i sigurimit do të ketë sensorë, ai do t’i nënshtrohet përditësimeve të ardhshme pa ndërprerje.
