Skuadra e Teutës në basketboll për meshkuj ka nisur nga puna për t’u përgatitur për sezonin e ri sportiv 2020-2021.
Puna te kjo skuadër ishte ndalur prej kohësh si pasojë e pandemisë Covid-19, ndërkohë që ende nuk dihet se kur do të nisë sezoni i ri, pasi pritet miratimi nga qeveria.
Klubi durrsak, prëmes postimeve në rrjetet sociale, deklaron se nga ekipi i Teutës janë larguar mjaft lojtarë gjatë muajve të fundit, të cilët kanë firmosur për skuadra të tjera. Gjithsesi, puna vijon nën drejtimin e trajnerit malazez Nikola Milatoviq, që është konfirmuar në krye të ekipit.
Ndërkohë, përforcimi i parë për sezonin e ri është basketbollisti amerikan Jordan Strawberry, i cili vjen nga NVAA. Për lojtarin shtatlartë amerikan kjo është përvoja e parë në Europë, ku shpreson të bëjë një paraqitje të mirë. Së shpejti klubi durrsak pritet të bëjë disa përforcime të tjera, për të ëenë pretendent për titull.
