Forcat e Armatosura të Maltës njoftuan se një anije patrulluese e këtij shteti i ka shpëtuar një grup prej 85 personave të premten në mbrëmje dhe se ata do të dërgohen në Maltë të shtunën në mëngjes.
Ushtria njoftoi se personat e shpëtuar po udhëtonin me një anije të drunjtë që po fundosej. Malta ka qenë një nga shtetet që më së shumti ka bërë përpjekje për t’i shpërndarë imigrantët e shpëtuar në shtetet e Bashkimit Evropian pasi anijet e shpëtimit nuk u lejuan të hyjnë në Itali.
Rasti më i ri ishte ai i anijes “Alan Kurdi”, me të cilën u shpëtuan 60 imigrantë. Pasi Italia ia refuzoi hyrjen në territorin e saj, anija i lëshoi këta persona në Maltë. Pritet që ata tash të dërgohen në Gjermani, Francë, Portugali dhe Luksemburg.
Komisioneri i Bashkimit Evropian që është përgjegjës për migrimin, Dimitris Avramopolous, e vizitoi Maltën këtë javë dhe e çmoi përgjigjen e ishullit ndaj migrimit ilegal në Detin Mesdhe. “Pa asnjë dyshim, Malta po përballet me sfida të mëdha të migrimit në krahasim me numrin e popullsisë”, tha Avramopoulos.
Malta i pranoi edhe 108 imigrantë të tjerë në muajin mars pasi autoritetet e rrethuan një anije të vogël që ishte marrë nën kontroll nga tre adoleshentë, të cilët kërkonin që ata të mos kthehen në Libi, por të shkojnë në Maltë, shkruan “Reuters”.