Papa Françesku do të takohet me Presidentin rus Vladimir Putin muajin e ardhshëm. Takimi vjen një ditë para se udhëheqësit katolikë nga Ukraina të takohen në Vatikan për të diskutuar pasojat nga përçarja midis Kishave Ortodokse Ruse dhe të Ukrainës, shkruan AP.
Vatikani konfirmoi të enjten audiencën e 4 korrikut. Do të jetë hera e tretë që Papa Françesku dhe Putin janë takuar.
Muajin e kaluar, Vatikani njoftoi se Papa kishte ftuar udhëheqjen e Kishës Katolike Greke të Ukrainës, një kishë minoritare besnike ndaj Papës, për takimet 5-6 korrik. Qëllimi, tha ai, ishte dhënia e mbështetjes "në situatën delikate në të cilën gjendet Ukraina".
