Kompania ajrore britanike, “British Airways”, rrezikon të dënohet me një gjobë shumë të lartë prej 183 milionë funtesh për shkak të shkeljes së vitit të kaluar në sistemet e sigurisë.
Zyrtarët e kësaj kompanie kanë thënë se janë të befasuar dhe të zhgënjyer nga gjoba e dhënë nga Zyra e Komisionerit për Informim. Ata deklaruar se kompania ishte cak i hakerëve, të cilët e kryen një sulm të sofistikuar kriminal.
Në anën tjetër, Zyra e Komisionerit për Informim tha se kjo është gjoba më e lartë që e ka dhënë ndonjëherë për ndonjë kompani dhe e para që është bërë publike sipas rregullave të reja.
Rregullorja e Përgjithshme për Mbrojtjen e të Dhënave hyri në fuqi vitin e kaluar dhe ishte ndryshimi më i madh në 20 vjetët e fundit sa i përket legjislacionit për mbrojtjen e të dhënave.
Kompania “British Airways” i ka 28 ditë afat për të paraqitur ankesë kundër këtij vendimi. Willie Walsh, shef ekzekutiv i kompanisë “IAG”, pjesë e së cilës është edhe “British Airways”, tha se do të ndërmerren të gjitha masat e mundshme për ta kundërshtuar këtë gjobë.
Incidenti ishte zbuluar më 6 shtator të vitit 2018, ndërsa besohet se hakerët kanë marrë të dhëna të ndryshme të udhëtarëve, si emra, adresa elektronike dhe të dhëna për kartelat bankare, shkruan “BBC”.
