Kryeministri i Italisë, Giuseppe Conte, do të raportojë të mërkurën në kuvendin Italian lidhur me dyshimet se partnerja e koalicionit qeveritar, partia e së djathtës ekstreme, “Lidhja”, ka kërkuar para nga Rusia.
Conte, I cili është udhëheqës i qeverisë mes lëvizjes “Pesë Yjet” dhe partisë “Lidhja”, tha se do të flaës në kuvend pasi Matteo Salvini, zëvendëskryeministër i Italisë dhe kryetar i “Lidhjes”, refuzoi të japë hollësi për partnerin e koalicionit lidhur me këto akuza.
Sidoqoftë, Salvini vazhdimisht ka mohuar se partia e tij ka marrë të holla nga Rusia, pas raportimeve se një nga ndihmësit e tij është përpjekur ta nënshkruajë një marrëveshje për naftë në një hotel të Moskës. Sipas këtyre raportimeve, marrëveshja do t’i siguronte para partisë “Lidhja” për ta financuar fushatën e vet para zgjedhjeve evropiane të muajit maj.
Nuk ka dëshmi që kjo marrëveshje është arritur, por dyshimet, të cilat së pari u ngritën në shkurt, bënë që prokurorët italianë të fillojnë hetime për këtë rast.
Salvini i ka mbrojtur marrëdhëniet me Rusinë që nga koha kur u bë kryetar i partisë në vitin 2013 dhe vazhdimisht ka bërë deklarata pozitive për presidentin e Rusisë, Vladimir Putin, shkruan “The Guardian”.