Brukseli paralajmëron Francën për "lirinë e mediave"

Evropë

Brukseli paralajmëron Francën për "lirinë e mediave"

Më: 23 nëntor 2020 Në ora: 14:15
Një gazetar i agjencisë France Press.

Gazetarët francezë dhe organizatat për lirinë e mediave janë duke e kundërshtuar një projektligj të sigurisë në Francë, në bazë të të cilit do të kufizohej e drejta për të filmuar ose fotografuar pjesëtarët e policisë që janë në detyrë.

Komisioni Evropian në një përgjigje për agjencinë AFP ka thënë se mediat duhet të jenë në gjendje të “punojnë lirshëm".

"Komisioni nuk komenton mbi projektligjet, por thekson se në një periudhë krize është më e rëndësishme se kurrë që gazetarët të jenë në gjendje të bëjnë punën e tyre lirshëm dhe me siguri të plotë", tha zëdhënësi i BE-së Christian Wigand.

Të premten, parlamenti francez miratoi ligjin e përditësuar të sigurisë, një nen i të cilit do të penalizonte botimin e imazheve të oficerëve të policisë me arsyetimin se një gjë e tillë “dëmton integritetit fizik ose psikologjik" të tyre.

Sindikatat e medias thonë se kjo mund t'i japë policisë një dritë jeshile për të parandaluar gazetarët të bëjnë punën e tyre, dhe potencialisht të dokumentojnë veprimet joligjore nga forcat e sigurisë.

Policia thotë se ata ballafaqohen me një rrezik të madh personal gjatë kryerjes së detyrës dhe se dhjetëra policë janë plagosur në përleshjet me protestuesit në vitet e fundit.

Sot mund të lexoni Shfletoni kopertinat