Një komandë e tërë e shërbimit sekret rus FSB thuhet se i ishte caktuar kritikut të Kremlinit Navalny. Rusia deri më tani ka heshtur në lidhje me akuzat e reja. Në vend të kësaj, Ministri i Jashtëm Sergei Lavrov ankohet për partnerët perëndimorë. Heshtja e Rusisë nuk është pranim i fajit.
Ministri i Jashtëm rus Sergei Lavrov ka akuzuar Perëndimin për sjellje joetike në trajtimin e sulmit me helm ndaj kritikut të Kremlinit Alexei Navalny. "Ne jemi mësuar me faktin që SHBA dhe vendet e tjera Perëndimore thjesht shpallin akuza të reja kundër Rusisë në media - pavarësisht nëse bëhet fjalë për hakera ose për helmim të dyfishtë apo edhe të trefishtë të Navalny", tha Lavrov gjatë një vizite në kryeqytetin kroat në Zagreb.
Në fillim të javës "Spiegel" raportoi se kritiku i Kremlinit ishte helmuar nga agjentët e FSB-së. "Të gjitha këto raporte janë argëtuese për t'u lexuar," tha Lavrov. Sidoqoftë, mënyra në të cilën bëhen këto akuza dëshmon për "mungesën e ndonjë standardi etik midis partnerëve tanë perëndimorë", tha Lavrov. Ai gjithashtu u ankua se heshtja e Moskës pas zbulimit të fakteve të pretenduara në lidhje me çështjen Navalny do të shihej si një pranim i fajit.
Vërejtjet e Lavrov me sa duket kishin të bënin me një pyetje në lidhje me një raport të medias britanike se Navalny u helmua më shumë se një herë në gusht. Kremlini dhe vetë Navalny më parë e kishin hedhur poshtë këtë raport si të pakuptimtë. Një video që Navalny publikoi të hënën bazuar në kërkimet nga një rrjet i mediave ndërkombëtare dhe të dhënat e tij, aktualisht diskutohen shumë më tepër në Rusi dhe në arenën ndërkombëtare.
Video brizante nga Navaln
Në një filmim, i cili u shikua më shumë se dhjetë milion herë nga e Mërkura pasdite, ai akuzoi tetë punonjës të FSB-së si përgjegjës për sulmin me neurotoksinën Novitschok. Kremlini deri më tani ka heshtur ndaj akuzave dhe zëdhënësi Dmitri Peskov anuloi përkohësisht njoftimet e tij të përditshme për shtyp. Lavrov nuk i komentoi në mënyrë të qartë as këto zbulime. Mediat supozojnë se Presidenti Vladimir Putin ndoshta do të thoshte diçka në konferencën e tij të madhe vjetore për shtyp të enjten.
Navalny u alivanos më 20 gusht në një fluturim nga Tomsk në Siberi për në Moskë. Dy ditë më vonë, 44-vjeçari, ende në gjendje kome, u soll në Spitalin Universitar Charité në Berlin për mjekim.
Sipas tre laboratorëve evropianë, rezultatet e të cilave janë konfirmuar nga Organizata për Ndalimin e Armëve Kimike (OPCW), Navalny u helmua me një helm nervor kimik nga grupi Novichok. Moska mohon çdo përfshirje. Navalny është ende në Gjermani, ku po rikuperohet nga sulmi.
