Punonjësit e Vatikanit nuk duhet të pranojnë ndonjë dhuratë të lidhur me punën me vlerë më shumë se 40 €. Këto janë rregullat e reja anti-korrupsion të shpallura nga Papa Françesku. Kreu i Kishës katolike kërkoi që kardinalët të deklarojnë periodikisht se po investojnë vetëm në fonde në përputhje me doktrinën katolike dhe nuk janë nën hetim penal ose kanë para në parajsat fiskale.
Masat e reja ishin të nevojshme për të parandaluar dhe luftuar, në çdo sektor, konfliktin e interesit, metodat e patronazhit dhe korrupsionin në përgjithësi. Ati i Shenjtë ka folur në lidhje me pastrimin e korrupsionit në Vatikan që kur u bë udhëheqës i 1.3 miliard katolikëve në botë tetë vjet më parë. Ligji i ri shënon hapin e tij më të madh për të siguruar që kardinalët dhe menaxherët e tij janë të pastër.
Sipas dekretit, punonjësit e rinj duhet të nënshkruajnë një deklaratë se ata kurrë nuk janë dënuar për një krim, as nuk janë nën hetim për vepra që përfshijnë pastrim parash, korrupsion, mashtrim, shfrytëzim të të miturve.
Deklarata duhet të riafirmohet çdo dy vjet, me rrezik shkarkimi ose gjobitje nëse dikush zbulon se ka gënjyer. Rregulloret e reja do të hyjnë në fuqi brenda 90 ditëve. Në tetë vitet e fundit, Papa Françesku ka mbyllur mijëra llogari të dyshuar, ka pushuar nga puna zyrtarë të lartë financiarë dhe ka kërkuar të përmirësojë administrimin e Selisë së Shenjtë.
