Trembëdhjetë persona që udhëtuan nga Afrika e Jugut në Holandë janë zbuluar se ishin të prekur nga varianti i coronavirusit Omicron, tha të dielën ministri holandez i Shëndetësisë, Hugo de Jonge.
Sipas mediave të huaja, ata kishin fluturuar me linjën ajrore holandeze KLM për në Amsterdam të premten.
Në total, autoriteti shëndetësor në aeroportin Schipol testoi mbi 600 pasagjerë nga dy fluturime të KLM, me 61 rezultate pozitive.
Të gjithë të prekurit ishin të izoluar në një hotel karantine.
De Jonge u bëri thirrje sërish të gjithë personave që kanë hyrë në Holandë nga Afrika Jugore që nga e hëna e kaluar që të testohen menjëherë për coronavirusin.
Lloji Omicron është klasifikuar si një “variant shqetësimi” dhe frika po rritet se ai është më i transmetueshëm, megjithëse shumë gjëra mbeten të paqarta.
Qendra Evropiane për Kontrollin e Sëmundjeve ka thënë se lloji mund të zvogëlojë ndjeshëm efektivitetin e vaksinave të disponueshme dhe të rrisë rrezikun e riinfektimit.
Përhapja e llojit në Holandë erdhi pasi vendi po ashpërsonte masat në përgjigje të një rritje të mprehtë të numrit të infeksioneve me Covid-19 dhe pacientëve që kishin nevojë për trajtim spitalor.
Nga e diela, do të vendoset një bllokim në mbrëmje, që do të thotë që dyqanet, vendet kulturore, restorantet dhe klubet sportive duhet të mbyllen në orën 17:00. Supermarketet janë të përjashtuara nga masa.
Kufizimet fillimisht do të zbatohen deri më 18 dhjetor.
Ndërkohë është bërë e ditur se shkollat do të qëndrojnë të hapura për momentin, por kërkesat për veshjen e maskave janë vendosur për nxënësit e moshës 10 vjeç e lart kur ata nuk ulen në tavolinat e tyre.
Rregulloret për distancimin social janë vendosur në kinema, teatro dhe restorante, ku klientët duhet të qëndrojnë 1.5 metra larg njëri-tjetrit, duke bërë të nevojshme kufizime në numrat e lejuar. Maska kërkohen gjithashtu në këto mjedise.
Kryeministri Mark Rutte tha se vendi duhej të arrinte një kthesë pasi ai njoftoi rregullat e reja të premten.
Zyrtarët nënvizuan edhe përkeqësimin e situatës në spitalet e vendit.
Pas kësaj, Qeveria po planifikon të vlerësojë në mesin e dhjetorit se deri në çfarë mase masat e reja reduktojnë në të vërtetë shifrat e infeksionit.
