Policia zvicerane përdor plumba gome në protestën anti-Iran

Evropë

Policia zvicerane përdor plumba gome në protestën anti-Iran

Më: 2 tetor 2022 Në ora: 13:12
Një protestues në Bukuresht mban portretin e Mahsa Aminit.

Policia zvicerane ka përdorur plumba gome gjatë një proteste pranë Ambasadës së Iranit në Bern, teksa dy persona kaluan rrethojat e Ambasadës dhe hoqën flamurin Iranin që po valëvitej pranë misionit diplomatik të Teheranit.

Autoritetet nuk raportojnë për të lënduar në këtë protestë, e cila ishte një prej dhjetëra protestave të ngjashme që u mbajtën në mbarë botën, në solidaritet me protestat që po mbahen në Iran pas vdekjes së një gruaje 22-vjeçare, e cila vdiq teksa po mbahej nga Policia.

Mahsa Amini vdiq më 16 shtator pasi ishte arrestuar nga Policia e moralit, nën dyshimet se nuk kishte respektuar rregullat e veshjes së hixhabit, apo shamisë së kokës.

Që nga vdekja e saj, në Iran janë organizuar protesta.

Në Bern, Policia tha se ka përdorur plumba gome pasi disa protestues, gjatë demonstratës së paautorizuar, tentuan të hynin në oborrin e Ambasadës së Iranit.

Dy persona që arritën të hynin në oborrin e Ambasadës janë arrestuar, njoftoi Policia.
Më 1 tetor, protesta janë mbajtur në 159 qytete në mbarë botën, tha një organizatë iraniane për të drejtat e njeriut.

Irani ka fajësuar forcat e jashtme për nxitjen e protestave, që janë protestat më të mëdha në këtë shtet në vitet e fundit.

Aktivistët dhe familjarët e Aminit thonë se ajo u vra pas goditjeve në kokë, teksa gjendej në ndalim policor. Ata kanë hedhur poshtë pretendimet e autoriteteve se Amini vdiq si pasojë e një sulmi në zemër.

Lajmi për vdekjen e saj rriti zemërimin në Iran, shtet që përballet me pakënaqësi sociale dhe kushte të rënda të jetesës, për shkak të krizës ekonomike. Situata ekonomike në Republikën Islamike është përkeqësuar qëkur Shtetet e Bashkuara rivendosën sanksione ekonomike, pas tërheqjes nga marrëveshja bërthamore që Teherani nënshkroi më 2015 me fuqitë botërore./REL

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat