Hetime po zhvillohen për të zbardhur se si raketa e qëlluar pak ditë më parë ra në territorin polak.
Sidoqoftë, për sekretarin e Shtetit Antony Blinken, përgjegjëse për incidentin është vetëm një palë.
“Cilidoqoftë përfundimi final, ne e dimë që pala përgjegjëse e këtij incidenti tragjik është Rusia”, tha ai.
Ndërkohë, presidenti polak Andrzej Duda deklaroi se pjesëmarrja e Ukrainës në hetim duhet të bëhet sipas ligjeve ndërkombëtare.
Duda tha se, nëse zyrtarët e Kievit janë të interesuar të shohin procedurat e hetimit, autoritetet polake mund t’ua tregojnë, por pjesëmarrja në proces, aksesi tek dokumentet dhe informacioni kërkojnë një bazë ligjore konkrete.
Në fshatin ku ra raketa, e cila u mori jetën 2 personave, banorët shprehen të tronditur dhe të trembur se mos lufta ka kaluar kufijtë.
“Ne nuk e prisnim këtë ngjarje, edhe pse episode të tilla do të ndodhin. Kur lufta zhvillohet 6 kilometra larg fshatit tonë, ky lloj aksidenti mund të ndodhë në çdo kohë”, u shpreh Ewa Byra, drejtoreshë shkolle në Przevodov
Liderët perëndimorë janë përpjekur të qetësojnë frikën për një përshkallëzim të luftës, duke thënë se rënia e raketës ishte një aksident.
Shtetet e Bashkuara dhe NATO mbështetësin pretendimin e Varshavës, se raketa ishte qëlluar nga Ukraina, por Kievi e refuzon kategorikisht përgjegjësinë.
