Presidenti i Serbisë, Aleksandar Vuçiq, në Instagramin e tij ka postuar një video ku tregon akomodimin ku do të qëndrojë në ditët në vijim.
Vuçiq nga sot e deri më 9 shtator po qëndron në Podrinje, ndërsa në video mburrej se nuk do të qëndrojë në hotel, por në kazermë. Në video, Vuçiq tregon se si duken dhomat në kazermë, ambientet sanitare dhe dhoma ku thotë se do të fle.
Në video, presidenti i Serbisë tregon një shtrat, një televizor dhe një frigorifer.
“Ata e sollën këtë frigorifer të vogël nga zyra ime në Beograd”, thotë Vuçiq dhe më pas kalon te dollapi. “Këmisha janë gati”, tha ai duke hapur dollapin.
“Do të jetë interesante për ditët e ardhshme këtu në Loznicë dhe Podrinje dhe pres që do të bëjmë shumë për njerëzit. Siç e shihni do të jetë e mrekullueshme dhe e bukur për mua dhe shpresoj që njerëzit të jenë të kënaqur pas gjithçka që bëjmë për ta”, tha ai.
