Emri i Neymar vazhdon të lidhet ngushtë me një largim të mundshëm nga Paris Saint Germain.
Ylli brazilian i futbollit pritet të rikthehet në La Liga, pasi është i pakënaqur në Paris, dhe destinacionet e mundshme për të janë Barcelona dhe Madridi.
Neymar ka kaluar tashmë dy sezone me parisienët, por duket se kjo kohë nuk i ka pëlqyer aspak lojtarit.
Skuadra kampione e Ligue 1 ka konfirmuar bisedimet për largimin e tij, por nuk ka dhënë përgjigje konkrete për Barcën apo Real Madridin.
“Negociatat janë më të avancuara se kurrë, por nuk ka ndonjë marrëveshje” ka thënë drejtori sportiv i PSG, Leonardo.
“Do të shohim se çfarë ndodh, secili ka nevojë të qartësojë të ardhmen” ishin fjalët e tij.
Deri më tani është konfirmuar se Neymar nuk paraqitet në ndeshjen hapëse të PSG në Ligue 1, kundër Nimes, të dielën.