Trajneri Jurgen Klopp pret t’i kthehen Fabinho dhe Dejan Lovren në stërvitje gjatë javës së ardhshme, ndërsa James Milner dhe Naby Keita s’do të jenë në dispozicion për ndeshjen e Liverpoolit kundër Tottenhamit.
Mesfushori defansiv, Fabinho, ka qenë jashtë fushës së lojës që nga fundi i nëntorit, kur e pësoi një dëmtim të ligamenteve të kyçit të këmbës në barazimin 1:1 kundër Napolit në Ligën e Kampionëve.
Qendërmbrojtësi Lovren e kishte shijuar një ecuri të mirë me skuadrën e Liverpoolit, mirëpo ai tani po mungon që rreth një muaj shkaku i një problemi muskulor, ndërsa Joe Gomez ka qenë mbresëlënës përkrah Virgil van Dijkut në mbrojtje.
Megjithatë, të dy futbollistët janë afër kthimit në fushën e lojës dhe kthimi i tyre mund të vijë në kohë për ndeshjen e fundjavës së ardhshme, kundër Manchester Unitedit.
“Presim që Dejan dhe Fabinho të kthehet javën tjetër në stërvitje të plota. Do ta shohim nëse kjo do të jetë e mjaftueshme për ndeshjen kundër Manchester Unitedit”, tha Kloppi.
“Ata po punojnë me të vërtetë shumë, kanë bërë punë të madhe, është një gjë shumë e mirë kjo”.
Ndërkohë, dyshja e mesfushës, Milner dhe Keitan, do ta kenë të pamundur të luajnë të shtunën në Londër kundër Tottenhamit shkaku i problemeve muskulore.
“James dhe Naby nuk janë në dispozicion. Që të kanë probleme muskulore, por të ndryshme”, shtoi Kloppi.
“Nuk kemi ndonjë afat kohor për kthimin e tyre. Ne jemi të hapur për ta kurdo që duan të na bashkohen, kur të na i jep ekipi mjekësor dritën e gjelbër. Jo këtë javë, as javën e ardhshme, atëherë do ta shohim”.
