Futbolli vendor në zi, ndërron jetë Gëzim Kaçaniku - Bota Sot
Futbolli vendor në zi, ndërron jetë Gëzim Kaçaniku

Futboll

Futbolli vendor në zi, ndërron jetë Gëzim Kaçaniku

Më: 21 shkurt 2020 Në ora: 10:34
Gëzim Kaçaniku

Në moshën 49 vjeçare është ndarë nga jeta Gëzim Kaçaniku.

Lajmi është bërë i ditur nga familjarët e tij në rrjetin social Facebook.

Kaçaniku ishte ish-futbollist i shquar nga Mitrovica, ndërsa së fundmi ishte edhe trajner i Trepçës.

Ai ndërroi jetë pas një sëmundje prej të cilës vuajti gjatë viteve të fundit.

Me këtë rast ka reaguar edhe Federata e Futbollit të Kosovës, ku kryetari Agim Ademi ka dërguar një telegram ngushëllim.

E nderuara familje Kaçaniku,
Të nderuar drejtues dhe anëtarë të KF “Trepça” dhe KF “Trepça’89”,
Të nderuar dashamirë të futbollit në Mitrovicë,

Me pikëllim të thellë e morëm lajmin për ndarjen nga je ta të më të dashurit tuaj, mikut tonë Gëzim Kaçaniku, andaj më lejoni që në emrin tim, KE të FFK-së dhe gjithë komunitetit të futbollit në Kosovë, që të Ju shpreh ngushëllimet e mija më të thella.

Kaqa, siç njihej nga të gjithë ne Gëzimi, dha kontribut të madh për futbollin e Kosovës, fillimisht si futbollist në epokën më të vështirë të saj, atë që njihet si periudha e sakrificës dhe e mbijetesës, e më pas edhe si trajner i shquar në edukimin dhe zhvillimin e gjeneratave të reja të futbollit mitrovicas. Prandaj, humbja e tij është e madhe jo vetëm për familjen dhe KF ‘Trepça’ e KF “Trepça’89”, klube në të cilat dha kontribut si futbollist e trajner, por për mbarë komunitetin e futbollit në Kosovë.

Përkushtimi në punë, dashuria për futbollin, urtësia dhe profesionalizmi i tij bëjnë që Kaqa të mbetet gjithmonë në kujtesën e miqve, kolegëve, gjeneratave të reja, por edhe në historinë e futbollit tonë.

Kaqa ishte i veçantë, sepse përveç që ishte i palodhshëm ishte person shumë pozitiv, ngase edhe atëherë kur atmosfera nuk ishte e mirë, ai dinte që me batutat e tij të veçanta gjithçka ta kthente në pozitivitet.

Në këto momente të vështira për Ju, jemi pranë jush që të përballoni më lehtë dhembjen për më të dashurin tuaj.

I lehtë i qoftë dheu i Kosovës!

Me respekt
Agim Ademi, president i FFK-së

Shfaq komentet
comments powered by Disqus
Sot mund të lexoni Shfletoni kopertinat