Albaniku fitoi turneun e Futbollit në kuadër të “Javës së Minatorëve” - Bota Sot
Albaniku fitoi turneun e Futbollit në kuadër të “Javës së Minatorëve”

Futboll

Albaniku fitoi turneun e Futbollit në kuadër të “Javës së Minatorëve”

Nga: F. B. Më: 23 shkurt 2020 Në ora: 18:11
Albaniku

Për dy ditë rresht në fushën me bar sintetik “Eurosport” në Mitrovicë është zhvilluar turneu tradicional në futboll të sallës në kuadër të “Javës së Minatorëve”, ku sivjet morën pjesë 9 skuadra nga njësi edhe reparte të ndryshme të kombinatit Metalurgjik “Trepça”.

Turneu është pjesë e aktiviteteve që zhvillohen në shënimin e përvjetorit të 31-të Grevës së Minatorëve të cilët në mbrojtje të subjektivitetit dhe Kushtetutës ishin ngujuar në grevë në horizonte nëntokësore, goditje që ishte fillimi i shkatërrimit të Jugosllavisë.

Turneu është organizuar nga komisioni i Kombinatit Trepça në përbërje Kajtaz Xhemajli dhe Smajl Haxha si dhe Shoqata Rajonale e Klubeve të Futsallit Futsal-Mitrovica, ndërsa ndeshjet janë zhvilluar në sistemin secila me secilën dhe janë gjykuar nga dyshja e referve Mentor Baliu dhe Fatmir Abrashi.

Pas serisë së zhvilluar nga dy ndeshje për secilën skuadër katër skuadrat më të mirë të renditura në grupe, për gjysmëfinale u klasifikuan Flotacioni, Elektromakineria, Albaniku dhe Artana.

Image

 

Shorti ka vënë përballë njëra tjetrës skuadrat Flotacioni dhe Elektromakineria , ku në kohën e rregullt ndeshja përfundoi në barazim, ndërsa Flotacioni me penallti fitoi 3:2.Ndërkohë në gjysmëfinalen tjetër Albaniku ishte dukshëm skuadër më e fortë se Artana, të cilën e mundi me rezultatin 4:0.

Ndeshja finale mes Albanikut dhe Flotacionit ishte shumë ndeshje e fortë edhe rivalizuese, por fitore shënuan Albaniku me rezultat 2:0 dhe merituan titullin e skuadrës fituese të turneut.

Për skuadrën fituese organizatorët kanë dhuruar Kupën kalimtare dhe nga një palë tuta sportive së bashku me medalje ari, ndërsa skuadra që zuri vendin e dytë meritoi medalje argjendi dhe fanella, portieri më i mirë u shpall portieri i Artanës Zahir Arifi, ndërsa golashënuesi më i mirë me 5 gola u shpall Arben Halili.

Sot mund të lexoni Shfletoni kopertinat