Skuadrat e Kategorisë Superiore kanë rifilluar srëvitjet për pjesën në vijim të sezonit, pas ndërprerjes për shkak të Kampionatit Botëror. Shumë klube po përgatiten në vendin tonë e ka të tjera si Partizani që ka udhëtuar drejt Turqisë apo Vllaznia që është akomoduar në Mal të Zi. Ndërkohë, një pjesë e ekipeve kanë nisur të luajnë ndeshje miqësore për të matur forcat e tyre.
Tirana ka zbritur në fushë dje përballë Besës në ndeshjen e luajtur në stadiumin “Selman Stërmasi” , teksa ka fituar me rezultatin 3-1 falë golave të Xhixhës, Patrik e Nikqit. Për bardheblutë kjo ndeshje ka shërbyer edhe për të përgatitur Superkupën e Shqipërisë që luan në javën e ardhshme ndaj Vllaznisë.
Kjo e fundit ka luajtur sot në Ulqin përballë FK Zora Shpuz. Shkodranët kanë fituar me shifrat 3-0, ku golat i ka shënuar Marku në pjesën e parë dhe Vulaj e Aralica në të dytën.
Ndërkohë, Kukësi ka luajtur dje miqësore me Dinamon duke matur forcat me një skuadër të Kategorisë së Parë të ndërtuar për t’u kthyer në elitë. Skuadra e Dobit ka mposhtur atë të Dedes me shifrat 2-1, falë golave të Dacit e Berishës ndërsa Taulant Marku shënoi për blutë.
