Mats Hummels (35 vjeç) në Itali, duke filluar nga kjo verë? Sipas gazetës gjermane “BILD” është një mundësi reale. Milani dhe Juventusi janë dy klube shumë të interesuara për nënshkrimin e qendërmbrojtësit gjerman, të cilit i skadon kontrata me Borussia Dortmund.
Hummels, i cili pas pak ditësh do të luajë finalen e Champions League kundër Real Madridit në “Wembley”, nuk e ka mbyllur këtë mundësi dhe do ta vlerësojë me shumë kujdes pas përfundimit të sezonit.
As finalja e Champions League, e siguruar si protagonist absolut me Borussia Dortmundin e tij, nuk e ndryshoi mendjen e Julian Nagelsamann. Mats Hummels, ashtu si Leon Goretzka, nuk do të jenë pjesë e ekipit kombëtar gjerman për Kampionatin Evropian në shtëpi, që do të fillojë më 14 qershor.
Hummels, i cili fitoi Kupën e Botës 2014 në Brazil, nuk do të jetë atje, pavarësisht një sezoni të mrekullueshëm.
Aty do të jetë Nico Schlotterbeck, bashkëlojtari i Hummels në skuadrën verdhezi.
